Borgarafundur á Þorlákshöfn – 60% kvótans hefur verið seldur úr þorpinu á árinu
Haldinn verður opinn borgarafundur í Ráðhúsi Sveitarfélagsins Ölfuss í Þorlákshöfn fimmtudaginn 11. ágúst kl. 20.00 til að ræða sölu á 1.600 tonnum af kvóta úr byggðarlaginu og afleiðingar þess. Það eru Píratar í Suðurkjördæmi sem boða til fundarins.
30-40 missa vinnuna
Hafnarnes VER í Þorlákshöfn hefur selt HB Granda botnfiskkvóta sem svarar til tæplega 1.600 þorskígildistonna og hyggst HB Grandi flytja kvótann til Vopnafjarðar. „Afleiðingar þessarar sölu eru augljóslega atvinnumissir 30-40 einstaklinga sem unnið hafa fyrir Hafnarnes VER,“ segir í tilkynningu frá Pírötum.
Ástæður sölunnar eru að með þessum viðskiptum greiðir Hafnarnes VER úr skuldamálum félagsins sem stofnað var til með kaupum á aflaheimildum. Að sögn bæjarstjóra er þetta „Kjaftshögg (fyrir byggðarlagið) að aflaheimildirnar fari“.
„Eftir standa fjölskyldur sem þurfa að leita sér að vinnu og það er ekki um auðugan garð að gresja í Þorlákshöfn fyrir fiskvinnslufólk. Tilhögun núverandi kvótakerfis gerir það að verkum að svona atburðir gerast. Til samanburðar má geta þess að þegar rúmlega 30 störf hverfa úr jafn litlu byggðarlagi og Þorlákshöfn, þá jafnast það á við að í kringum 300 manns misstu vinnuna í Reykjanesbæ eða á Akureyri,“ segir í tilkynningu Pírata.
„Þetta bætist ofan á ákvörðun sjávarútvegsráðherra að skerða strandveiðikvóta á suðursvæði á sama tíma og heildarkvóti strandveiða er aukinn á öðrum svæðum.
Þrátt fyrir loforð stjórnmálamanna um aðgerðir og breytingar á kvótakerfinu gerist ekkert. Í febrúar á þessu ári kvörtuðu bæjarfulltrúar í Grindavík sáran yfir að missa skip og kvóta á Fáskrúðsfjörð. En ekki eru nema 2 ár síðan flutningur á kvóta úr þremur byggðarlögum höfðu einmitt gríðarleg áhrif á 150 fjölskyldur og 70 manns fluttu til Grindavíkur. Það voru taldir vera „Stórkostlegustu hreppaflutningar síðari tíma“.“
Píratar í Suðurkjördæmi vilja með þessum borgarafundi opna á umræðu um alvarleika málsins og þá miklu brotalöm sem felst í núverandi kvótakerfi, tapi og skerðingu aflaheimilda úr Suðurkjördæmi. Sjávarútvegsstefna Pírata verður kynnt, rædd verður spilling í kerfinu, skoðanakúgun og þöggun í sjávarbyggðum. Fulltrúar Eflingar stéttarfélags mæta og Forseti bæjarstjórnar í Sveitarfélaginu Ölfuss.
Bæjarstjórnin harmar þróun á aflaheimildum í Þorlákshöfn
Á vef sveitarfélagsins kemur fram að á innan við ári hafa rúmlega 3500 þorskígildistonn verið seld fyrirtækjum utan sveitarfélagsins en þessar aflaheimildir telja 60% skráðra veiðiheimilda í sveitarfélaginu á líðandi fiskveiðiári. „Bæjarstjórn Ölfuss harmar þá þróun sem orðið hefur í sveitarfélaginu varðandi stöðu aflaheimilda á síðustu árum og þá sérstaklega síðustu mánuðum.“
Samkvæmt fréttatilkynningu sem birtist á vefsíðu HB Granda 26. júlí sl. munu aflaheimildir þær sem áður tilheyrðu Hafnarnesi Ver verða nýttar til að tryggja afla til vinnslu á Vopnafirði. Aflaheimildir Hafnarness Vers eru um 28% skráðra aflaheimilda í Þorlákshöfn á yfirstandandi fiskveiðiári.
„Þetta er hrikaleg þróun, í raun ótrúleg og hugsanlega fordæmalaust að jafn stór hluti veiðiheimilda hverfi úr einni verstöð á jafn skömmum tíma með tilheyrandi afleiðingum. Um 32% skráðra aflaheimilda í Þorlákshöfn voru sl. haust seldar þegar Skinney Þinganes keypti öll hlutabréf í Auðbjörgu. Skinney Þinganes heldur úti öflugum rekstri í Þorlákshöfn og bera bæjaryfirvöld traust til þess að sú starfsemi muni vaxa og dafna um ókomna tíð. Slík þróun mun því miður ekki eiga sér stað með þær aflaheimildir sem tilheyrðu Hafnarnesi Ver og nú hverfa úr sveitarfélaginu.
Forsvarsmönnum sveitarfélagsins finnst mjög miður að frétta fyrst af sölu veiðiheimilda Hafnarness Vers í gegnum fjölmiðla, þó svo vitað hafi verið að skuldastaða fyrirtækisins væri erfið. Forsvarsmenn sveitarfélagsins hafa jafnan hvatt til þess að leitað sé leiða til að selja veiðiheimildir innan sveitarfélagsins og með hagsmuni samfélagsins í huga sé þess nokkur kostur. Með því móti er hægt styrkja stöðu heimabyggðar í fiskveiðum og vinnslu til framtíðar.
Það kemur reglulega í ljós að þeir fyrirvarar sem sveitarfélög hafa samkvæmt lögum til að tryggja veiðiheimildir í heimabyggð eru bara til málamynda. Segja má að það eina sem forsvarsmenn sveitarfélaga geti gert til að hafa áhrif á að veiðiheimildir haldist í heimabyggð sé að höfða til eigenda þeirra fyrirtækja sem yfir aflaheimildunum ráða. Því fylgir mikil ábyrgð að vera handhafi veiðiheimilda og það er mikilvægt samfélagsmál að eigendur þessara fyrirtækja horfi til hagsmuna þeirra sveitarfélaga sem þeir starfa í og leiti allra leiða til að ráðstafa veiðiheimildum innan síns byggðarlags.
Bæjaryfirvöld Sveitarfélagsins Ölfuss munu koma þeim skilaboðum á framfæri við stjórnvöld að verja þurfi sérstaklega störf tengd sjávarútvegi í byggðum landsins þar sem sjávarútvegur er grunnatvinnugrein. Það er óásættanlegt að tugum starfa sé ógnað í aðgerðum sem teljast mega ónauðsynlegar í samfélagslegu tilliti.“
